Archive for the ‘ Czekawòstczi ’ Category

Pòwszédny Spisënk Wszëtczich ë Wszëtczégò

Òd 1 łżëkawiata zacznie sã Nôrodny Spisënk w jaczim, më Kaszëbi, mdzemë mùszelë zadeklarowac sã czim më jesmë. Wicy ò Spisënkù mòże sã dowiedzec na starnie spis.kaszubi.pl Wôrt je na ną starã zazdrzec.

Rôczã téż na starnã Nasze Kaszuby, dze mòże wzyc udzél w kôrbiónce tikający sã Spisënkù.

„Cëchô” Nataliô

Piesnią „Cëchô wòda” Nataliô Szroeder dobëła program Szónsa na sukces, jaczi béł wëemitowóny 13 strëmiannika w TVP2. Gratulacëje!
Mëszlã, że cësk na rozsądzenié jury miało téż wëkònanié bez Nataliã piosenczi pò kaszëbskù ò brzózce.
Wëstãp Natalie mòże òbezdrzec tuwò.

Biôtka na głosë i Szansa na sukces

Biôtka na głosë i Szansa na sukces to je kaszëbskô sobòta i niedzela…
W sobòtã 12 strëmiannika karno spiéwôków pòd przédnictwã Maceja Miecznikòwsczégò z Pòbłocégò zaprezentëje sã w Biôtce na głosë. Pòczątk programù gòdz. 8 wieczór na TVP2. Żlë mdze Wama sã widzôł wëstãp naszich sélôjta SMS-ë!

Zôs w niedzelã 13 strëmiannika włączëta krajewą 2 ò 3.25. W programie Szansa na sukces wëstąpi Nataliô Szreoder z Parchòwa, chtërnô mdze spiéwa piesniã z repertuaru Marilë Rodowicz.

Jihaha

Kaszëbsczé Artisticzné Duò, to je Tómk Fópka ë Riszard Bòrisónk, wëdało swòją pierszą platkã pt. We Dwa Kònie. Do platczi na jaczi nalazło sã 29 piesniów, doparłãczonô je ksążeczka z tekstama, jilustrowónô òdjimkama Sławòmira Czaleja. Mie nôbarżi widzy sã piesniô Kaszëbi w Europie – je to czëstô prôwda ò dzysdniowim swiece. Bédëjã serdeczno.
Wëdôwcą platczi je Kaszëbskô Artisticznô Agencjô a nôgraniô zrëchtowało North Studio z Pôlczëna.
Wicy ò platce mòże przëczëtac tuwò

Jón Natrzecy w akcje!

Lëdzëska dôjta bôczënk… Ju wnetk dopôdnie Waju

KÒMÙDA

Biôtka na głosë

Wczerô (23 gromicznika) mógł òbezdrzec na 2 kanale TVP repòrtôż z wëbiérczi do nowégò mùzycznégò programù pt. “Biôtka na głosë. Lëdzy do swòjégò karna przësłëchiwôł Macéj Miecznikòwsczi rodã z Pòbłocégò w wejrowsczim krézu.
Zarôzka na zôczątkù mógł ùczëc kaszëbską gôdkã w wëkònanim Miecznikòwsczégò ë białczi w strzédnym wiekù, chtërnô zaspiéwała jedną z kaszëbsczich lëdowëch piesniów. Wszëtkò fejn, leno realizatorzë negò repòrtażu zôs „pòjachalë” stereòtipama: Chto gôdô pò kaszëbskù? Lëdze stôri a w strzédnym wiekù. Jakô je jejich ùlëdónô mùzyka? Lëdowô! Czemùż nie pòkôzelë niżódnégò młodégò Kaszëbë? Kò wiedzec je, że w programie wëstąpią chòcbë Tómk Fópka ë Weronika Kòrthals-Tartas, a ti do starszëch doch nie nôleżą 🙂
Premiera “Biôtczi na głosë” mdze 5 strëmiannika. Czekawé cëż to téż mdze. Na gwës czile esemesów na “najich” nót mdze wësłac.

Òpòwiédz mie bôjkã

W gòdnikù 2010 rokù, starą Nadbôłtowégò Ceńtrum Kùlturë we Gduńskù, wëszła drëkã pësznô ksążeczka z 13 kaszëbsczima bôjkama pò kaszëbskù ë pòlskù. Do ni doparłãczonô òstała platka CD – bôjczi czëtają Zbigniéw Jankòwsczi (kaszëbskô wersjô) i Violetta Seremôk-Jankòwskô (pòlskô wersjô).
Bôjczi wëbrôł dr Duszón-Władisłôw Pażdzersczi, dolmaczënk zrëchtowała Danuta Pioch a malënczi Éwa Pòklewskô-Koziełło.
Nót nadczidnąc, że ksążeczka ë platka są baro profesjonalno zrëchtowóné – cwiardô òbkłôdka, farwné malënczi, czekawô mùzyka! Mie sã baro widzy, temù wszëtczima jã bédëjã… le czë dlô wszëtczich sygnie? Chòc wëdanié ùdëtkòwioné bëło bez wiele kaszëbsczich samòrządzënów ë Ministerstwò Kùlturë, wëdrëkòwónëch òstało leno 2 tës. sztëk.
Wicy wiadłów ò ksążce nalezeta na starnie NCK, a pôrã malënków mòżeta òbezdrzec tuwò

Òpasëj… bò sã wëpùrgniesz!

W Wejrowie na jednym z przeńsców wprowadzony òstôł na zëmã nowi szasowi wid:
BIÔJ… LE ÒPASËJ BË SÃ NIE WËPÙRGNĄC!

          

Wejrowskô e-kapsuła

Czekawi projekt pn. Kaszëbskô e-kapsuła pamiãcé, zaczãła Pòwiatowô i Mieskô Pùblëcznô Biblioteka w Wejrowie m. Aleksandra Majkòwsczégò. Na starnie http://biblioteka.wejherowo.pl/ekapsula/ mòże nalezc gôdczi z czekawima lëdzama zajimającyma sã kaszëbizną. Donëchczas mòże pòsłëchac wëpòwiéscy Duszana Władisława Pazdzersczégò, Bòżenë Ptôch, Tomasza Fópka ë mòji skrómny persónë 🙂

 

Pùpa

Dlô nëch, co skùńczëlë 30 lat a jesz nie nalezlë swòji drëdżi pòłowë, kréwni abò drëchòwie robią z szôtorów pùpã. Dlô stôrëch kawalérów je to snôżô białeczka, dlô stôrëch brutkówpëszny chłop.
Pùpã robi sã nié le dlô szpòrtu, ale téż dlô zachãtë, bë „stôri” sã w żëcym za ną prôwdzëwą miłotą rozezdrzelë 😉
Nen czekawi zwëk jesz tam-sam je na Kaszëbach kùltiwòwóny.
Na òdjimkù chłopskô pùpa dlô brutczi pòzwónô Frãc.
Wiôldżé dzãka dlô mòji drëszczi, chtërna prawie szukô za prôwdzëwim, bëlnym, fòrsz chłopã, nôlepi Kaszëbą, za pòzwòlenié òpùblikòwaniô òdjimka ji „bëńla”, jaczégò dostała na 30-té ùrodzënë.

Ne starnë ùżëwôją kùszków (an. cookies). Przezérając je bez zjinaczi ùstôwù przezérnika dôwôsz zgòdã do jich spamiãtëwaniô.