Archive for the ‘ Wiérztë ’ Category

Na wdôr naszińców

Zdrzącë na Arkónã
Dzejów Słowión swiôdka
W szëmie mòrsczich wiatrów
Bôłtu wałów trzôskù
Dze w prastôrëch bògów
Sedzbie zatacony
Zaklãtô je pamiãc
Stalatów minionëch
Ùczuł jem skamiałé
Przódków najich dëchë
Sënów swëch rodzonëch
Wòłającëch do se

Zdrzącë na Arkónã
Dzejów najich swiôdka
Czuł jem pùstonocné
Spiéwë ë mòdlëtwë
Pò pamiãcy sztrądze
Stąpôł jem z nôdzeją
Że nie przeńdã nigdë
Greńcë zabôczeniô…

Na wdôr naszińców: prof. Gerarda Labùdë, Jerzégò Dąbrowë-Januszewsczégò, Sztefana Fikùsa.

Pùckô frańtówka

Na latosy Zjôzd Kaszëbów, jaczi mdze 26 czerwińca w Pùckù napisôł jem taką frańtówkã:

Czej rôz Jezës sztrądã szedl
Do rëbôka Piotra rzekl:
„Pùckôj za mną
drëchù mój” –
stąd sã wzãla pòzwa Pùck

Ref.
Pòjta, pòjta tu do nas
Pùck serdeczno rôczi was
Pòjta, pòjta tu do naju
Pùcónie witają waju

Pòjta wszëtcë na nen rum
Dze zapadli w zemi zómk
Òbezdrzeta stôri rénk
Pùcczi Plëtë pëszny brzég

Chtëren chce Kaszëbą bëc
Mùszi wëbrac sã na zjôzd
W Pùckù egzaminë zdac
Wãgòrzowi
kùsa dac…

Mùzykã ùlożił Tadeusz Kòrthals a spiéwają Manijôcë.
Pòsłëchôjta:
pucka frantowka

Chto mô chãc zaspiewac wicy dlô tegò jesz czile sztrofków: Read more

Piesniô mòrzëcë

Pòj, dó miã, pòj
Rãkã dôj
Pëszną piesnią
Wòłóm ce
          Wòłóm ce do se

Pòj, za mną, pòj
Jô cë dóm
Z
gladë mòrza
Òbrôz mój
         
Snôżi òbrôz mój

Pòj, do mie, pòj
Darënk wez
Sklący słuńcã
Mòrsczi skôrb
          Mòrsczi słuńca skôrb

Pòj, ze mną, pòj
W
spikù zdrój
Dze na wieczi
Bãdzesz mój
          Wieczno bãdzesz mój

Lëzëno, lëpińc 2009 r.

Ne starnë ùżëwôją kùszków (an. cookies). Przezérając je bez zjinaczi ùstôwù przezérnika dôwôsz zgòdã do jich spamiãtëwaniô.