Tekstów wiele… na Wielé

W zélnikù (12 a 13) mdze we Wielu XXXX Turnér Lëdowëch Gôdôszów z Kaszëb a Kòcewégò. Czas nëkô… a niechtërny pewno mają jiwer, jaką gôdkã zaprezeńtowac. Żlë kòmù tekstów brëkùje, nen mòże nalezc je w nônowszim zbiérkù felietónów Rómka § Tómka przecywiónka. Ksążeczka nie je drogô (kòsztô 25 zlotëch z nyma wszëtcziam vatama i sratama), a mòże jã kùpic w internetowim krómie Kaszubska Książka, zaplacëc kôrtą czë jak tam kòmù wëgódno, a brifka (mòże nawetka mdze to nen z Pëlckòwa) jã dodóm przëniese.
Regùlamin a wszelejaczé infòrmacëje ò Turnéru nalézeta na starnie Mùzeùm Kaszëbskò-Pòmòrsczi Pismieniznë w Wejrowie.
Hewò niżi dwie próbczi:

Jeden z felietónów Tómka:

Jeden z felietónów Rómka:

Warendorf – kaszëbsczé Gòdë i kònie

Czejbë të Dzecątkò na Kaszëbach bëlo rodzoné…
Czejbë të Dzecątkò na Kaszëbach bëlo rodzoné…

Cëż wespólnégò mają sobą kóń ë Gòdë? Hewò to, że pòd kùńc lëstopadnika prôcownicë Mùzeùm Kaszëbskò-Pòmòrsczi Pismieniznë i Mùzyczi w Wejrowie bëlë wëjachóny do Warendorf w Niemcach rôczony bez Zapôdnoprësczé Mùzeùm. Tã wejrowsczi mùzealnicë zrëchtowelë gòdną wëstawã… Òdjimczi z wernisażu nalézëta tuwò
W sklôdze kaszëbsczi delegacje bëlë: Benita Grzenkòwicz-Ropela – kùratór wëstawë, Wòjcech Wesserling – lëdowi kùńsztôrz, R.D. to znaczi jô, nôleżnicë Kaszëbsczégò Duò Artisticznégò tzw. „dwa kònie” – Tomôsz Fópka, chtëren jak to w zwëkù mô dëbeltno reprezeńtowôl Kaszëbë: 1. jakno direchtór wejrowsczégò mùzeùm ë 2. jakno spiéwôk. W ti slédny fùnkcje towarzël mù „drëdżi kóń” – Riszard Bòrësónk, chtëren grôl na akòrdiónie. Ne „dwa kònie”, w sobòtã 19 lëstopadnika 2016 rokù, òbczas wernisażu wëstawë, na chtërny nawetkã dosc wiela lëdzy przëszlo, delë kòńcert kaszëbsczich i niemieczich gòdowëch piesniów. Bezpieczno a wëgódno dowiózl naju donąd a nazôd, kùczer czerëjący mechanicznyma kòniama, szoféra z Szëmôłda Adóm Czoska.
Króm tegò rozmajité kònie – jednofarné, wielofarwné, dzywné, mòderné, wiôldżé a malińczé spòtikelë më wnetka w kòżdim nórce chòdzącë szasëjama Warendorfù – dzélëk nich widzec je na òdjimkach:

Continue reading “Warendorf – kaszëbsczé Gòdë i kònie”

Costerina 2015

SONY DSC

A co tam, pòchwôlã sã 🙂 Z latosy Costerinë, XVI Tôrgów Kaszëbsczi i Pòmòrsczi Ksążczi, przëwiózł jem dodóm nôdgrodã za ksążkã „To je krótczé, to je dłudżé…”. Òbsãdzëcelowie delë mie za niã II plac w kategòrie nôùkòwé i pòpùlarnonôùkòwé pùblikacje.
Westrzód nôdgrodzonëch nalazlë sã m.jin. Artur Jablońsczi, dr Hana Makùrôt, dr Ludmiła Gòłąbk, prof. Adóm Sykòra, Òla i Dark Majkòwsczi a mój méster repòrtażu Edmùńd Szczesôk. Wszëtczima serdeczno gratulëjã!

(spisënk nôdgrodzonëch)

Continue reading “Costerina 2015”

Alejô Kaszëbsczich Legeńdów

Dzysô (18 czerwińca) béł jem razã z Andrzejã Arendtã ë Tomekã Fópką zajachóny do Òstrzëców. Ò 1 pò pôłnim bëło tã ùroczësté òtemkniãcé Aleji Kaszëbsczich Legeńdów ë promòcjã ksążczi pòd nym samim titlã. Na Aleji mòże òbezdrzec 20 tôflów z òbrôzama, jaczé zaprojektowôł Andrzéj Arendt. Ne graficzi są téż jilustracjama w ksążce, w jaczi dô do przeczëtaniô 20 sztëk rozmajitëch òpòwiescy ò mòrzëcach, jezornicach, klabaternikù, Gòskù… Jejich przédną témą je wòda. Niechtërné z nëch tekstów napisôł jem na spòdlim lëdowëch òpòwiescy (m.in. wëzwëskùjącë Słowôrz ks. Zëchtë), zôs niechtërné są bez mie wëmëszloné (ùdbòdôwcą témów béł T. Fópka). W ksążce mòże je przeczëtac pò kaszëbskù, pòlskù, niemieckù (dolmacza Emiliô Leszkòwskô) ë anielskù (dolmacza Paùlinô Kòwalewskô). Ùdbòdôwcą pòwstaniô Aleji i wëdaniô ksążczi béł direchtór Gminowégò Òstrzódka Kùlturë w Somòninie Marión Kòwalewsczi.
Ksążkã mòże kùpic m.jin. w Turisticzny Jinfòrmacje w Òstrzëcach. Priz je czësto môłi – kò 7 złotëch to nie je wiele.

Continue reading “Alejô Kaszëbsczich Legeńdów”

Noc w Kùkówce

W piątk, 11 maja, w „Kùkówce” – sedzbie biblioteczi w Lëzënie, òdbëło sã zéńdzenié pòd zewiszczã Noc z lëteraturą, kùlturą ë wierzeniama Kaszëbów. Lëdzy bëło tak wiele, że nié wszëtcë mielë plac do sadnieniô – kò mùszi przëchadac na czas!
Gòscama zéńdzeniô bëlë, pòdôwóm wedle rokù ùrodzeniô, wiôlgòscë brzëcha a wieloscë piklów na gãbie:
ks. Sławòmir Czalej: 1971 – dosc brzëchati – głôdkò ògòlony,
Róman Drzéżdżón: 1972 – widzec je, że białka dobrze warzi – trzëdniowé pikle,
Tomôsz Fópka: 1973 – jaczis taczi wëpaniałi(!) – zarosłi. Continue reading “Noc w Kùkówce”

W nôdgrodã Kara

W piątk, 20 łżëkwiata, béł jem zajachóny mòją trzãsącą sã frańcëską auto-karą do Wiôldzi Wsë. Òd czwiôrtkù warałë tã warstatë dlô kaszëbsczi młodzëznë Remùsowô Kara. Bëła to ju piątô edicjô nëch pòtkaniów rëchtowónëch pòd ną pòzwą bez nôleżników Sztudérsczégò Klubù Pòmòraniô.

Na latosą Karã, jakô dosta zewiszcze Mòderné Kaszëbë, przëjachało 36 sztëk ùczniów wëżigimnazjowëch szkòłów, m.jin. zez Brus, Kòscérznë, Kartuz, Wejrowa, Pùcka, Lãbòrga. Ùdzél w Karze béł nôdgrodą za wëkònanié jednégò z zabédowónëch bez òrganizatorów dokôzów: 1. zrëchowanié plakatu, 2. nakrãcenié filmù Kaszëbë – My love, 3. napisanié òpòwiôdaniô fantasy z pòstacëjama z kaszëbsczi mitologie.
W piątk òd rena młodi mielë wiele warstatowëch zajmów m.jin. z geògrafie ë historie Kaszëb. A pò pôłnim karno pòdzelëło sã na mùzyków ë lëteratów.
Nëch pierszich prowadzący ùczbã, Tómk Fópka, pòdzelëł na sztërë pòdkarenka: lëteracką, mùzyczną, chòreograficzną ë téatralną a zanëkôł do robòtë. Pisalë òni tekstë, kòmpònowalë, spiéwalë a tuńcowalë.
Lëteracë mielë mni do robòtë. Bez wiãkszi dzél ùczbë słëchalë òpòwiescy ò pisanim ë lëteraturze. Nié le ti rodny, ale téż cëzojãzëkòwi, jakô nawlékô do kaszëbiznë. Pò wësłëchanim „pleszczeniô” jedny wzãlë sã za pisanié hòroskòpù, drëdżi dolmaczëlë tekst kaszëbsczi na pòlsczi jãzëk, a trzecy dzél òpòwiescë Leo Frankòwsczégò „Chłopiec i jego czołg” z pòlsczégò jãzëka tłómaczëlë na kaszëbsczi.
Pò wieczerze bëła gôdka ò kaszëbsczich sprawach wëgłoszonô bez przédnika KPZ, Łukasza Grzãdzëczégò, a diskùsëjô. Na gwës do pòzdny nocë warałë „młodych Kaszubów rozmowy” w wiãkszim dzélu w pòlsczi gôdce prowadzoné. Czemùż nié pò kaszëbskù? Hmmm…

Continue reading “W nôdgrodã Kara”

„Pokochaj mnie” w Teleexpressie

Jak da mie do wiédzë Weronika Kòrthals-Tartas 24 rujana w Teleexpresse mdze do òbezdrzeniô sztëczk ji nônowszégò telediskù do piosenczi pt „Pokochaj mnie”. Piesniô je pò pòlskù ale nalezc w ni mòże rozmajité kaszëbsczé akceńtë. Teledisk promùje nową platkã Weroniczi pt. „Velevetka”.
W całoscë klip mòże nalezc na You Tube abò na starnie Tómka Fópczi.
Teleexpress z negò dnia mòże nalezc tuwò

Remùs mp3

Nen naj lëteracczi Remùs mô cë żëcé i przigòdë pò żëcym! Béł ju na papiórze, béł na binie, béł w zdrzélnikù, béł w eterze, béł na blëwiązce, béł w kòmpùtrze, béł téż w płënie… a terô mòże jegò nalezc na mp3. Chto chce w taczim fòrmace Remùsa miec mùszi przëjic rôczbã Kaszëbsczi Artisticzny Agencje z Chwaszczëna a zjawic sã na jedny z niżi pòdónëch promòcëjów:
13 séwnika 2011 r. – Bëtowò, gòdz. 5 pp – restauracjô “Jaś Kowalski”
18 séwnika 2011 r. – Kòscérzna, gòdz. 20 minut pò 4 pp – Rënk, òb czas jimprezë “Kaszëbsczé bajanié”
22 séwnika 2011 r. – Serakòjce, gòdz. 5 pp – kòscół sw. Môrcëna
5 rujana 2011 r. – Bólszewò, gòdz. 4 pp – Pùblëcznô Biblioteka Gminë Wejrowò m. Aleksãdra Labùdë.

Tã sã dowiéta co, jak, czemù tak a za wiele 🙂

 

Biôtka na głosë

W sobòtã ò 8 wieczór nie zabôczta wësłac SMS-a na karno z Gdinie w programie Biôtka na głosë! Corôz lepi jima jidze, tej ni mô co scëskac dëtka w taszi le knypsac, knypsac…