Biôtka na głosë i Szansa na sukces

Biôtka na głosë i Szansa na sukces to je kaszëbskô sobòta i niedzela…
W sobòtã 12 strëmiannika karno spiéwôków pòd przédnictwã Maceja Miecznikòwsczégò z Pòbłocégò zaprezentëje sã w Biôtce na głosë. Pòczątk programù gòdz. 8 wieczór na TVP2. Żlë mdze Wama sã widzôł wëstãp naszich sélôjta SMS-ë!

Zôs w niedzelã 13 strëmiannika włączëta krajewą 2 ò 3.25. W programie Szansa na sukces wëstąpi Nataliô Szreoder z Parchòwa, chtërnô mdze spiéwa piesniã z repertuaru Marilë Rodowicz.

Jihaha

Kaszëbsczé Artisticzné Duò, to je Tómk Fópka ë Riszard Bòrisónk, wëdało swòją pierszą platkã pt. We Dwa Kònie. Do platczi na jaczi nalazło sã 29 piesniów, doparłãczonô je ksążeczka z tekstama, jilustrowónô òdjimkama Sławòmira Czaleja. Mie nôbarżi widzy sã piesniô Kaszëbi w Europie – je to czëstô prôwda ò dzysdniowim swiece. Bédëjã serdeczno.
Wëdôwcą platczi je Kaszëbskô Artisticznô Agencjô a nôgraniô zrëchtowało North Studio z Pôlczëna.
Wicy ò platce mòże przëczëtac tuwò

Biôtka na głosë

Wczerô (23 gromicznika) mógł òbezdrzec na 2 kanale TVP repòrtôż z wëbiérczi do nowégò mùzycznégò programù pt. “Biôtka na głosë. Lëdzy do swòjégò karna przësłëchiwôł Macéj Miecznikòwsczi rodã z Pòbłocégò w wejrowsczim krézu.
Zarôzka na zôczątkù mógł ùczëc kaszëbską gôdkã w wëkònanim Miecznikòwsczégò ë białczi w strzédnym wiekù, chtërnô zaspiéwała jedną z kaszëbsczich lëdowëch piesniów. Wszëtkò fejn, leno realizatorzë negò repòrtażu zôs „pòjachalë” stereòtipama: Chto gôdô pò kaszëbskù? Lëdze stôri a w strzédnym wiekù. Jakô je jejich ùlëdónô mùzyka? Lëdowô! Czemùż nie pòkôzelë niżódnégò młodégò Kaszëbë? Kò wiedzec je, że w programie wëstąpią chòcbë Tómk Fópka ë Weronika Kòrthals-Tartas, a ti do starszëch doch nie nôleżą 🙂
Premiera “Biôtczi na głosë” mdze 5 strëmiannika. Czekawé cëż to téż mdze. Na gwës czile esemesów na “najich” nót mdze wësłac.

Miłotny duet

Czej jesta zakòchóny, tej wôrt swòjémù mùlkòwi co zaspiéwac. Mòżeta to téż zrobic w duece, tak jak Werónika Kòrthals-Tartas ze swòjim slëbnym Łukaszã, chtërny nagrelë miłotną spiéwã pt. Wcyg òd nowa.
Teledisk mòżeta òbezdrzec na starnie Weróniczi w dzélu teledisczi. Żlë chto chce naùczëc sã słowów na pamiãc naléze je na starnie autora tekstu Tómka Fópczi.