Róman Drzéżdżón | Roman Drzeżdzon
Dze je nôwikszô drzewianô tôblëca z „Kaszëbsczima nótama”? Kò w Nowòwiesczim Wilkòwie – wsë rekòrdowò wiôldżich zachów. Mają tã wiôlgą kòrkã, stolemné „kòło wòzné” a jeden z nôdługszich délów na swiece. Tôblëca z „Nótama”, jaką zrëchtowôł stolôrz, Bògdón Karczewsczi z Łãczëców, je 2 na 3 métrë wiôlgô. Pierszi pòkôzk béł w niedzelã 17 maja 2015 r. Z tegò, co lëdze gôdają, co rok mô bëc w Wilkòwie stôwióny jeden stolemny elemeńt z ti kaszëbsczi wëliczónczi.
Dzywny lëdze krãcą sã pò swiece… to znaczi pò wejrowsczim pòwiôce, a sã zgriwają… to znaczi nagriwają szpòrtowné reklamë do I Przezérkù stand up comedy… To znaczi „Szpòrt na żokach”!
Pamiãtôjta: w czerwińcu… to znaczi równo 19-égò, pò pôłnim… to znaczi ò 6 gòdzënie, w restaùracje… to znaczi w Campanulë, w Miesce… to znaczi w Wejrowie!
I të mòżesz pòplestac… to znaczi wëstąpic na binie… to znaczi zrobic karierã kaszëbsczégò szpòrtmana!
Zgłoszenié sélôj do 12 czerwińca na adresã wejrowsczégò Mùzeùm Kaszëbskò-Pòmòrsczi Pismieniznë i Mùzyczi.
A czej chcesz miec szpòrtowną reklamã wspòmożë „Szpòrt na żokach”, tak jak to zrobia m.jin. Galeriô Niespòdzywnotë w Wejrowie.
Wtórk 5 maja 2015 rokù. Drzewiany kòscół w Serakòjach. Bënë młodzëzna z gimnazjum i spòdleczny szkòłë, dzecë z karna „Tuchlińskie Skrzaty”, përznã starszëch. Biją zwònë na 12. Zeszłëch witô a wëstawã pt. „To je krótczé, to je dłudżé…” òtmikô Emiliô Reclaf z Gminowégò Òstrzódka Kùlturë. Dzecë z Tëchlëna pëszno spiéwają. „Kaszëbsczé nótë” prezentëją w snôżi wersji. Miast „to je prosté, to je krzëwé” je „to je prosté, to je skòsné”. Tak trzëmac! Trójné dzãka Skrzatom! Dzãka wastnie Emilie i Irenie Kùlwikòwsczi – direchtorce GÒK w Serakòjcach. Dzãka Anie Dunst z Wëdôwiznë KPZ.
Słowiańsczi gard w Slawùtowie to pòstãpnô atrakcjô na Pùcczi Zemi. Wierã òb lato mdze slawùtowsczi gard atakòwóny bez hùrmë letników. Pò prôwdze wôrt je òbezdrzec ną pëszną rekònstrukcëjã.
Môj-czerwińc – do wëstãpù sã rëchtowanié.
12 czerwińca – do Przezérkù sã zapisanié.
19 czerwińca – na binie wëstãpòwanié.
Wicy wiadłów na starnie Mùzeùm Kaszëbskò-Pòmòrsczi Pismieniznë i Mùzyczi w Wejrowie
Wszëtczégò bëlnégò na Gòdë!
Gwiôzdkòwé nótë do pòsłëchniô a òbezdrzeniô w Mùzeùm Kaszëbskò-Pòmòrsczi Pismieniznë i Mùzyczi w Wejrowie.
Malënk Ana Kąkòl
Hewò nowô sztatura òsta pòstawionô w Swiãtim Miesce Kaszëbów – Wejrowie. Pësznô sztatura Remùsa. Òglowò mie sã widzy, le ju òpisënk do ni ju nié… A wa, cëż rzeczeta?
W dniach 25 ë 26 rujana béł jem w Tëchòmiu na warkòwniach gazétników zrëchtowónëch bez cządnik „Pòmeraniô”. Z Andrzejã Kraùze dostalë ma zadanié wëwiedzec sã cëż czekawégò je w Piôsznie. Chòc zëmno bëlo jak brzëdôl, równak lónowa sã nama zajachac do Klémensa Lemana – Kaszëbë, chtëren mô wiele czekawëch ùdbów. Midzë jinszima ùmëslëł so wëbùdowac 20-métrową tormã, wioskã Gòtów czë zrëchtowac dlô szkòlôków lasową klasã. Brzôd naji z Andrzejã wanodżi na Górã Lemana mdze mógł òszmakac w „Pòmeranie”. Na dzysô mùszi sygnąc czile òdjimków z Piôszna ë Tëchòmia.
