W Zylwestra 2022 rokù zajachôł jem na Nordã Kaszëb, bë chwacëc PANËSZCZI… Në i so ùdalo w Żelëstrzewie a Starzënie.
Znajeta tak co: Panëszczi 2022
KRÒ: Gwiżdż
Hewò pòstãpnô produkcjô krëjamnégò karna KRÒ (Kaszëbsczi Rock Òbrzãdowi). Ną razą je to piesniô ò krëjamnym GWIŻDŻU, jaczi w agwańce chòdzyl òd chëczi do chëczi, a pòdzérôl czë dzôtczi są grzéczné. Zbiérôl òn téż zamówienia na darënczi, jaczé we Wilëją wrãcziwôl dzecóm Gwiôzdór abò Pani Gwiôzdka. Gwiżdż bél téż prowadnikã Gwiôzdków, Panëszków czë Gwiżdżów, to je kòlãdników, jaczi w gòdowim czasu chòdzëlë pò kaszëbsczich wsach a miastach.
Klip do piesnie ò Gwiżdżu zrëchtowalo Mùzeùm Pùcczi Zemi miona F. Cenôwë a Stowôra Drëchów Mùzeùm Pùcczi Zemi. Wôrt dodac, że latos w gòdnikù, Gwiżdż, òprowôdzôl dzecë a mlodzëzna pò pùcczim mùzeùm.
Jinspiracją do napisaniô ny piesnie bél Gwiżdż ze Szlachecczi Kamińcë, chtëren tidzéń przed Gòdama wcyg pò ti wsë chòdzy, temù téż Jemù ną piesniã chcã zadedikòwac!
Gwiżdż
Gwiżdże Gwiżdż, gwiżdże Gwiżdż
Szëkùjta so lëdze!
Gwiżdże Gwiżdż, gwiżdże Gwiżdż
Gwiôzdkã zapòwiôdô!
Òcemnicą czëc je gwizd
Przez swiat jidze stôri Gwiżdż
Chòc zabëti je òn dzys
To do lëdzy cygnie wcyg
Ref. Gwiżdże Gwiżdż, gwiżdże Gwiżdż…
Ti pòstacje z dôwnëch lat
Mają lëdze dzysdnia strach
A chòc z gãbë strôszi je
Równak zloté serce mô
Ref. Gwiżdże Gwiżdż, gwiżdże Gwiżdż…
Gwiżdż do swiata mùszi jic
Chòc gò Grzenia tlëcze wcyg
Kò spisëje jaczi dôr
Gwiôzdka z nieba przëniesc mô
Ref. Gwiżdże Gwiżdż, gwiżdże Gwiżdż
Szëkùjta so lëdze!
Gwiżdże Gwiżdż, gwiżdże Gwiżdż
Gwiôzdkã zapòwiôdô!
Gwiżdże Gwiżdż, gwiżdże Gwiżdż
Chceta widzec Gwiôzdkã?
Gwiżdże Gwiżdż, gwiżdże Gwiżdż
Tej szëkùjta dëtka!
Barbara swiãtô ò rëbôkach pamiãtô….
…le czë rëbôcë ò Ni téż?
Hewò, co ò patrónce rëbôków zapisala Bòżena Stelmachòwskô (Rok obrzędowy na Pomorzu, Toruń 1933, s. 197-199):
Kaszëbsczi kòsmòs!
Wejrowò, Kaszëbskô Filharmòniô, 17. séwnika 2022, wieczór, premiera… Pò prôwdze KÒSMÒS!!!
Niżi përznã òdjimków, a żlë chceta wiedzec co wicy, czëtôjta TUWÒ
Szukając miłotë
Przódë lat, a bëlo to w 2010 rokù, napisôl jem tekst „Szukając miłotë”, jaczi w mùzykã òblekla Weronika Korthals. Na piesniô napisónô bëla apart dlô jedny, dzysô baro znóny wòkalistczi, co pòchôdô z Parchòwa. Równak, chòc na piesniô bëla ju nôgrónô, nigdë nie bëla pùblëczno zaprezeńtowónô… Móże czedës 😊
Zôs w 2016 rokù „Szukając miłotë” zaspiéwôl Przemk Bruhn. Ë tak dobrze zaspiéwôl, że dobél titel Kaszëbsczégò Idola!
Hewò na piesniô w wëkònanim Przemeka Bruhna. Na gitarze graje Łukôsz Nowicczi. Miks a mastering Tadeùsz Kòrthals. Nôgróné bëlo w North Studio w Swôrzewie 2022 r.
Szczescô lubny parmiéń
Mùjkający skarnie
Pòrénkòwim widã
Òblekô mie w farwë
Swiata przebùdzeniô
Żëcô namienieniô…
…a të dalek jes òd mie
Ref. Czemù tak dalek jes òd mie?
Dalek… chòcô wiész,
Że jô kòchóm… kòchóm Cebie
Chòc dalek jes òd mie
Czëjesz to i wiész
Że jô kòchóm… kòchóm Cebie
Czasã żëcô cénie
Smrokã tacą stegnë
Wãdrëjącë pò nich
Szukając ti jedny
W tësącu westchnieniów
W bólu namienieniô…
… dzes tam dalek nańdã Ce
A jak chceta poslëchac wicy sztëczków, do chtërnëch jô napisôl slowa, abò na jinszi ôrt jô kòl nich robil, to nalézeta je TUWÒ
XXIII Zjôzd Kaszëbów. Brusë 2022
Czemùż lubiã bëc na nëch fòlkloristiczno-jôrmarcznëch Zjazdach Kaszëbów? Kò bez ne snôżé ùsmiéchë, nëch redostnëch lëdzy…
Hewò, 50 fòtografków z latoségò Zjazdu:
XXII Zjôzd Kaszëbów. Pùck 2021
Jak to rzeklë ti wiesoli pùrtcë z Kabaretu Pùrtcë – pandemiô wzãla so ùrlop, temù téż Kaszëbi mòglë so 21 zélnika 2021 rokù spòtkac w Pùckù. Transcassubia bëla tak zapchónô, że w Redze, jak w japóńsczim metrze, nót bëlo lëdzy w banã na mòc wcëskac. W Pùckù jistno – hùrma lëdzy donąd a nazôd nëka pò miesce, dze atrakcjów bëlo skòpicą. Dwie binë mùzyczné – na Rinkù a Zelony Plażë, a jesz jedna, lëterackô, kòl miesczi biblioteczi, në ë wôłtôrz w rëbacczi hôwindze. Do te móg zwiedzac wëstawë w Rôtëszu a Mùzeùm Pùcczi Zemi. Móg dobrze zjesc a kùpic ksążków a pamiątków jak wiele so chca. Móg téż, kùszkającë wãgòrza, jaczi przerzeszony je do beczczi w parkù kòl Miesczégò Ùrzãdë, òstac Fejn Kaszëbą… kò zadzëwòwónëch a zaczekawionëch Kaszëbama letników téż na latosym Zjôzdze bëlo dosc tëlé.
XXII Swiatowi Zjôzd Kaszëbów na plus! Brawò Pùck!
Hewò lopk òdjimków:
KRÒ: Zajc 2020–2021
Hewò stôro-nowi, pandemiczno-kąsk pòliticzny, zajcowò-jastrowi sztëczk krëjamnégò karna KRÒ (Kaszëbsczi Rock Òbrzãdowi):
Zajc 2020-2021
Sedzy zajc pòd czerzã w larwie
Zajiscony w wôżny sprawie.
Cëż to bãdze?! Cëż to bãdze?!
Rozniesc jajów nie je w sztãdze.
A ja jej, a ja jej,
latos nie mdze
farwnëch jôj!
Òbleczony w mòro farwë
Tacą sã szandarzë wszãdze
Fùl robòtë mają rãce
Mańdat za mańdatã pãcô
A ja jej, a ja jej,
latos nie mdze
farwnëch jôj!
Temù zajc, bë mógł w swiat jic
Flot zaPiSôł…
flot zaPiSôł…
flot zaPiSôł sã do PiS
A ja jaje, a ja jaje
nié le w Jastra
taczé jaje!
Dëgù, dëgù, pò dwa jaja
A chto nie dô tegò prajã!
Kaszëbsczé emòtczi
Z leżnoscë Dnia Jednotë Kaszëbów, 19 strëmiannika ad. 2021, wespól z aùtorką malënków Joanną Grudnik, rôczã do scyganiô (darmôk!) a rozkòscérzaniô nëch snôżëch kaszëbsczich ‘emòtków’ i gifów.
A żlë chto bë chcôl je zlepszëc, zjinaczëc abò kòmercyjno wëzwëskac niech prosto dó miã napisze.
KRÒ: Gôdczi Mòrza
Karno KRÒ (Kaszëbsczi Rock Òbrzãdowi) wcyg nagriwô… Hewò piesniô „Gôdczi Mòrza” apart nagrónô na platkã „Do Mòrza”, jaką zrëchtowelë Kaszëbskò-Pòmòrsczé Zrzeszenié a Radio Gdańsk. Zadrzi TUWÒ a TUWÒ
Teledisk zrealizowôl Piotr Zatoń na spòdlim sztëczków z filmù „Historie w sieci zaplatąne”.
Na youtubòwim karnylu karna KRÒ mòże jesz nalezc: Cyberkòlãda, Zjazdowé Nótë a Scynanié Kani.
A z tegò, co je wiedzec, to jesz nie je kùńc jich mùzyczi…