Szukając miłotë

Przódë lat, a bëlo to w 2010 rokù, napisôl jem tekst „Szukając miłotë”, jaczi w mùzykã òblekla Weronika Korthals. Na piesniô napisónô bëla apart dlô jedny, dzysô baro znóny wòkalistczi, co pòchôdô z Parchòwa. Równak, chòc na piesniô bëla ju nôgrónô, nigdë nie bëla pùblëczno zaprezeńtowónô… Móże czedës 😊
Zôs w 2016 rokù Szukając miłotë zaspiéwôl Przemk Bruhn. Ë tak dobrze zaspiéwôl, że dobél titel Kaszëbsczégò Idola!
Hewò na piesniô w wëkònanim Przemeka Bruhna. Na gitarze graje Łukôsz Nowicczi. Miks a mastering Tadeùsz Kòrthals. Nôgróné bëlo w North Studio w Swôrzewie 2022 r.

Szczescô lubny parmiéń
Mùjkający skarnie
Pòrénkòwim widã
Òblekô mie w farwë
Swiata przebùdzeniô
Żëcô namienieniô
…a të dalek jes òd mie

Ref. Czemù tak dalek jes òd mie?
Dalek… chòcô wiész,
Że jô kòchóm… kòchóm Cebie

Chòc dalek jes òd mie
Czëjesz to i wiész
Że jô kòchóm… kòchóm Cebie

Czasã żëcô cénie
Smrokã tacą stegnë
Wãdrëjącë pò nich
Szukając ti jedny
W tësącu westchnieniów
W bólu namienieniô…
… dzes tam dalek nańdã Ce

A jak chceta poslëchac wicy sztëczków, do chtërnëch jô napisôl slowa, abò na jinszi ôrt jô kòl nich robil, to nalézeta je TUWÒ

Żniwnô spiéwka

Z pòzdrówkã a pòdzãką dlô wszëtczich tëch, co letczi robòtë ni mają…

Kadr z filmù ŻNIWA NA KASZBACH 2019

Robòtą ùbruniony
W czerwionym słunkù dnia
Złocësté secze zbòżé
Przebrzëdłi kómbajnista!

Ref. Nowòwiesczi lëdze!
Nowòwiesczi lëdze!
Nowòwiesczi lëdze wadzą!

Seczenim ùmãczony
Gbùr z trzôskã dodóm jedze
Scyrze w noc szczekają
Szkalëją na nie lëdze

Ref. Nowòwiesczi lëdze!
Nowòwiesczi lëdze!
Nowòwiesczi lëdze wadzą!

Żniwienié ju skùńczoné
Gbùr niese Panóm w dóm
Szkalingą òbòniony
Robòtë swòji plón!

Ref. Nowòwiesczi lëdze!
Nowòwiesczi lëdze!
Nowòwiesczi lëdze!
Chcą spòkój miec a… chléb!

Plón, niesemë plón,
Najim Panóm w dóm
Najim Panóm w dóm
Najim Panóm w dóm..
Dóm, dóm, dóm, dóm, dóm, dóm…
Wypierdalaj z tym kombajnem!!! Kurwa!!!

Pùck XXII Swiatowi Zjôzd Kaszëbów

Jak to rzeklë ti wiesoli pùrtcë z Kabaretu Pùrtcë – pandemiô wzãla so ùrlop, temù téż Kaszëbi mòglë so 21 zélnika 2021 rokù spòtkac w Pùckù. Transcassubia bëla tak zapchónô, że w Redze, jak w japóńsczim metrze, nót bëlo lëdzy w banã na mòc wcëskac. W Pùckù jistno – hùrma lëdzy donąd a nazôd nëka pò  miesce, dze atrakcjów bëlo skòpicą. Dwie binë mùzyczné – na Rinkù a Zelony Plażë, a jesz jedna, lëterackô, kòl miesczi biblioteczi, në ë wôłtôrz w rëbacczi hôwindze. Do te móg zwiedzac wëstawë w Rôtëszu a Mùzeùm Pùcczi Zemi. Móg dobrze zjesc a kùpic ksążków a pamiątków jak wiele so chca. Móg téż, kùszkającë wãgòrza, jaczi przerzeszony je do beczczi w parkù kòl Miesczégò Ùrzãdë, òstac Fejn Kaszëbą… kò zadzëwòwónëch a zaczekawionëch Kaszëbama letników téż na latosym Zjôzdze bëlo dosc tëlé.

XXII Swiatowi Zjôzd Kaszëbów na plus! Brawò Pùck!
Hewò lopk òdjimków:

Lëteracczi Ògródk:

Chtëren chce Kaszëbą bëc
Mùszi wëbrac sã na Zjôzd
W Pùckù egzaminë zdac
Wãgòrzowi 
kùsa dac…

Donąd na nazôd òd Rinkù bez rëbackô hôwinga do Zelony Plażë::

A na Rinkù tuńcowanié wôłtôka:

Jo, a za rok Zjôzd w Brusach…

Òdjimczi móże scygac a kòpiowac, kò fejn bë bëlo pòdac chòc adresã negò bloga 😉

Òdjimczi, wiadla a czekawinczi z ùszlëch Zjazdów nalézeta TUWÒ

KRÒ: Zajc 2020–2021

Hewò stôro-nowi, pandemiczno-kąsk pòliticzny, zajcowò-jastrowi sztëczk krëjamnégò karna KRÒ (Kaszëbsczi Rock Òbrzãdowi):

Zajc 2020-2021

Sedzy zajc pòd czerzã w larwie
Zajiscony w wôżny sprawie.
Cëż to bãdze?! Cëż to bãdze?!
Rozniesc jajów nie je w sztãdze.

A ja jej, a ja jej,
            latos nie mdze
                        farwnëch jôj!

Òbleczony w mòro farwë
Tacą sã szandarzë wszãdze
Fùl robòtë mają rãce
Mańdat za mańdatã pãcô

A ja jej, a ja jej,
           latos nie mdze
                        farwnëch jôj!

Temù zajc, bë mógł w swiat jic
Flot zaPiSôł…
            flot zaPiSôł…
                        flot zaPiSôł sã do PiS

A ja jaje, a ja jaje
      nié le w Jastra
            taczé jaje!

Dëgù, dëgù, pò dwa jaja
A chto nie dô tegò prajã!

Gôdczi Mòrza karna KRÒ

Karno KRÒ (Kaszëbsczi Rock Òbrzãdowi) wcyg nagriwô… Hewò piesniô „Gôdczi Mòrza” apart nagrónô na platkã „Do Mòrza”, jaką zrëchtowelë Kaszëbskò-Pòmòrsczé Zrzeszenié a Radio Gdańsk. Zadrzi TUWÒ a TUWÒ
Teledisk zrealizowôl Piotr Zatoń na spòdlim sztëczków z filmù „Historie w sieci zaplatąne”.

Na youtubòwim karnylu karna KRÒ mòże jesz nalezc: Cyberkòlãda, Zjazdowé Nótë a Scynanié Kani.
A z tegò, co je wiedzec, to jesz nie je kùńc jich mùzyczi…

Cyberkòlãda

Hewò darënk na Gòdë a cali 2021 ro(c)k òd krëjamnégò karna KRÒ:


Jinszé piesnie karna KRÒ móżeta nalezc TU a TU.

Wszëtczégò bëlnégò na Gòdë a nowi rok!!!

Cyberkòlãda

Merry Christmas ùszë sztopie
Smartfón w paji, pilot w gôrscy
Retransmisjã z Narodzeniô
Zapòwiôdô Santa tłësti

Ref.     Tivi-Gòdë, cyber-Gòdë
Kùgle, danczi, biôłé brodë
Zwónczi, sónczi, reniferë
Mikòłajów tësąc sztërë!

Gòdné bitë, gòdné bajtë
Pò sécowim krążą niebie
Skąd cyfrowi pikselaniół
Na swiat sélô cyberżëczbë

Ref.     Tivi-Gòdë, cyber-Gòdë…

A jô bë tak òd Gwiôzdczi chcôł darënk
A jô bë tak brzadową zupã zjôdł
A jô bë tak pòd danką rôd so sôdł
A jô bë tak kòlãdã zaspiéwôł…

Ref.     Tivi-Gòdë, cyber-Gòdë…

Gwiżdż z Kamińcë Szlachecczi

Gwiżdż z pòmòcnikã w Kamińcë Szlachecczi, òdjimk: Angelika Szulfer

Na Kaszëbach na Wilëją darënczi dzecóm dôwô pòstacjô zwónô: Gwiôzdór, Gwiôzdka, Pani Gwiôzdka abò Panëszka. Przódë lat, w niejednëch môlach Kaszëbsczi, ju w adweńtowi czas, dodomë nawiedzywôl krëjamny Gwiżdż, chtëren zapòwiôdôl gwiôzdkã.

Dzysdnia Gwiżdża z pòmòcnikã mòże jesz pòtkac w Kamińcë Szlachecczi (gmina Stãżëca). Chòdzą òni tidzéń przed Wilëją pò dodomach, spisëją jaczé darënczi domôcy chcą dostac, a sprôwdzają czë wszëtcë są grzéczny.

Hewò tak ò ti pòstacji pisôl Andrzéj Bùkòwsczi:
Drugim zwiastunem zbliżania się świąt jest Gwiżdż albo Gwizd, jakaś tajemnicza postać, która w ciągu ostatnich kilkunastu dni Adwentu niepostrzeżenie chodzi wieczorami, skrada się pod okna. Nadsłuchuje, czy dzieci są grzeczne i przeciągle gwiżdże, wzbudzając postrach i zapowiadając w ten sposób, że niedługo, „gwiazdki” zaczną chodzić.
Zwyczaje kaszubskie w czasie Bożego Narodzenia, w: „Kaszuby”, nr 12/1936, s. 1.

Zôs Bernat Zëchta dôl taczi òpisënk:
Gwiżdż 1. ‘przewodnik oprowadzający gwiôzdkã i oznajmiający jej przybycie dzwonkiem lub gwizdaniem’
W Wygodzie i Chmielnie już trzy dni naprzód, w Żurominie nawet tydzień przedtem
gwiżdż òbchòdzy wies i gwizdaniem na piszczówce zapowiada odwiedziny gwiôzdczi, po czym wchodzi w dom i spisëje domôcëch ‘domowników’, szczególnie zaś dzecë. Zamiast ołówkiem posługuje się długim patykiem, skąd powstało tam przysłowie o kimś, kto niewyraźnie pisze: Ten tak pisze jak gwiżdż. Gwiżdż opuszczając chatę m.in. upomina starszëch, czyli rodziców (Wygoda):
A të òjcze, matkò, dzecë bróń,
Bò tu przińdze straszny kóń,
Bãdze skôkôł i wëwijôł,
I te môłé dzôtczi pòzabijôł!
(…) Strój
gwiżdża bywa różny. Najczęściej gwiżdż je òblokłi w kòżëch wëwrócony na rãbë, na głowie mô kapelusz, a w garscë trzimô krëkùlëcã.
Słownik gwar kaszubskich…, t. I, s. 395-6.

Za òdjimk a wiadla dzãkùjã Angelice Szulfer. A jak jesz ni môta pòdarków, tej wôrt kùpic co kaszëbsczégò z ji krómù FARWA.

Ne starnë ùżëwôją kùszków (an. cookies). Przezérając je bez zjinaczi ùstôwù przezérnika dôwôsz zgòdã do jich spamiãtëwaniô.